Cənubi Koreyanın milli təhlükəsizlik üzrə müşaviri Vi Son Lak Hörmüzlə gəmilərin hərəkətinin hələ də bloklandığı üçün Seulun boğaza alternativ marşrutlar axtarmağa davam edəcəyini bildirib.
"Report" xəbər verir ki, bu barədə "Yonhap" informasiya agentliyi məlumat yayıb.
Brifinqdə çıxışı zamanı Vi vurğulayıb ki, hökumət boğazda İran tərəfindən davam edən məhdudiyyətlərlə bağlı narahatlıqlar fonunda bundan sonra da xam neftin alternativ tədarükünü təmin etmək niyyətindədir.
"Hörmüz boğazından gəmilərin hərəkəti pozulmuş olaraq qalır. Tədarük zəncirlərindəki qeyri-müəyyənlik çox güman ki yaxın vaxtlarda da davam edəcək", - o bildirib.
Vi əlavə edib ki, atəşkəs razılaşması əldə olunduqdan sonra boğazdan keçən gəmilərin sayı artmayıb.
"Əgər boğazda ilişib qalan 2 minə yaxın gəmi eyni vaxtda oradan çıxmağa cəhd edərsə, bu, vaxt apara bilər, təhlükəsiz marşrutların təmin edilməsi isə həmçinin mürəkkəb məsələyə çevriləcək", - o deyib.
Onun sözlərinə görə, hökumət bütün gəmilərin və onların heyətlərinin, o cümlədən Hörmüz boğazında bloklanmış vəziyyətdə qalan Cənubi Koreya bayrağı altındakı 26 gəminin təhlükəsizliyini təmin etmək üçün əlaqədar ölkələrlə qarşılıqlı əməkdaşlığı davam etdirmək niyyətindədir.