"Karvan-Yevlax" Misli Premyer Liqasında ardıcıl ikinci qələbəsini qazanıb.
"Report"un məlumatına görə, bölgə təmsilçisi XXVIII turda "Şamaxı"nı qəbul edib.
Ötən tur "Kəpəz"ə qalib gələn (4:1) meydan sahibləri bu dəfə rəqibini minimal hesabla üstələyib - 1:0. Yeganə qolu 39-cu dəqiqədə Coy Sleyd Mikels vurub.
Qələbə sayəsində xallarının sayını 14-ə çatdıran "Karvan-Yevlax" sonuncu - 12-ci pillədə qərarlaşıb. "Şamaxı" 32 xalla 7-ci sıradadır.
Xatırladaq ki, tura aprelin 19-da yekun vurulacaq. Ötən gün "Turan Tovuz" "Araz-Naxçıvan"ı üç cavabsız qolla üstələyib. "Zirə" - "Neftçi" matçında qalib müəyyənləşməyib - 1:1.