Yaz fəslinin gəlişi ilə bir çox insan həyatında yenilik etmək, sağlam vərdişlər formalaşdırmaq və özünü daha yaxşı hiss etmək üçün fürsət axtarır. Mütəxəssislər bildirir ki, bu dövrdə gündəlik vərdişlər sağlamlıq və əhval-ruhiyyə üzərində ciddi təsir göstərə bilər.
Lent.az xəbər verir ki, bəzi adi vərdişlər yorğunluğun artmasına, immunitetin zəifləməsinə və əhval dəyişikliklərinə səbəb ola bilər.
Gec yatmaq vərdişi
Mütəxəssislər qeyd edir ki, gec yatmaq bioloji saatın pozulmasına səbəb olur. Xüsusilə yazda günlərin uzanması bu problemi daha da gücləndirir. Nəticədə yuxu keyfiyyəti aşağı düşür, səhər oyanmaq çətinləşir, enerji və diqqət azalır. Bu vəziyyət həm də hormonal balans və emosional durum üzərində mənfi təsir yarada bilər. Tövsiyə olunur ki, yuxu rejimi tədricən – hər bir neçə gündə 15-30 dəqiqə tezləşdirilsin. Hətta gec yatdığınız halda belə, hər gün eyni saatda oyanmağa çalışmaq vacibdir.
Açıq havada az vaxt keçirmək
Qışdan sonra bir çox insan evdə daha çox vaxt keçirmək vərdişini davam etdirir. Lakin bu, yorğunluq hissini artırır və insanı xarici mühitdən uzaqlaşdırır. Hətta qısa gəzinti, otağın havalandırılması və ya açıq havada içilən bir fincan qəhvə belə enerjini artırmağa və əhvalı yaxşılaşdırmağa kömək edir.
Həddindən artıq kofein qəbulu
Soyuq aylarda isti içkilərə, xüsusilə qəhvəyə meyl artır. Lakin kofeinin çox qəbulu yuxuya mənfi təsir göstərir. Mütəxəssislər gündüz saatlarında içilən əlavə qəhvəni kofeinsiz variant və ya çayla əvəz etməyi məsləhət görür.
Fiziki aktivliyin azlığı
Qış mövsümündə azalan hərəkətlilik yazda da davam edə bilər. Bu isə stress səviyyəsinin yüksəlməsinə və ümumi sağlamlığın pisləşməsinə gətirib çıxarır. Kiçik addımlarla başlamaq – məsələn, işdən sonra qısa gəzinti və ya evdə 10–15 dəqiqəlik məşq artıq faydalıdır.
Evdə qarışıqlıq və nizamsızlıq
Məkanın səliqəsiz olması insanın psixoloji vəziyyətinə təsir edərək yorğunluq və gərginlik hissini artırır. Yaz mövsümü evi yeniləmək üçün ideal vaxt hesab olunur. Mütəxəssislər tövsiyə edir ki, kiçik sahələrdən başlamaq və hər bir əşya üçün sadə qərar vermək lazımdır: saxlamaq, bağışlamaq və ya atmaq.
gündəlik vərdişlər