Stiven Hokinq 2014-cü ildə verdiyi media müsahibəsində tam mənada təkmilləşmiş süni intellektin yaradılmasının insan irqinin sonunu gətirə biləcəyi barədə açıq şəkildə xəbərdarlıq etmişdi.
Lent.az xarici mediaya istinadla xəbər verir ki, Hokinq son kitabı olan "Böyük suallara qısa cavablar"da texnologiya tamamilə insan nəzarətindən çıxmazdan əvvəl elmi ictimaiyyəti və hökumətləri süni intellektin inkişafını ciddi şəkildə tənzimləməyə çağırmışdı.
Hokinq iddia edirdi ki, maşınlar müəyyən bir həddə çatdıqdan sonra özlərini daim artan sürətlə yenidən dizayn edəcəklər. O, insanların təkmilləşmiş alqoritmlərlə rəqabət apara bilməyəcəyindən narahat idi. Bəşəriyyətin yavaş bioloji təkamüllə məhdudlaşdığını, yəni süni intellektin insan qabiliyyətlərini sürətlə ötəcəyini və qlobal sistemlərdə hökmranlıq edəcəyini qeyd etmişdi.
Bundan əlavə, hərbi süni intellekt təhlükəsinə də diqqət çəkən alim, avtonom silahlardan istifadə edilməklə başlayacaq qlobal silahlanma yarışının qaçılmaz olaraq fəlakətli qlobal münaqişələrə yol açacağı barədə xəbərdarlıq etmişdi.
Hokinq həmçinin süni intellektin ciddi iqtisadi nəticələrini də öncədən görmüşdü. Zavod avtomatlaşdırılması və intellektual məlumat emalının orta təbəqənin iş yerlərini itirməsinə səbəb olacağını və qlobal sərvət bərabərsizliyini kəskin şəkildə artıracağını bildirmişdi.
Lakin Hokinqin əsl qorxusu, süni intellektin bəşəriyyətin sağ qalması ilə tamamilə bir araya sığmayan hədəflər inkişaf etdirməsi idi. O inanırdı ki, super zəkalı süni intellekt öz hədəflərinə çatmaqda son dərəcə səmərəli olacaq və əgər bu hədəflər bizimlə üst-üstə düşməsə, bəşəriyyət təhlükə altına düşəcək.
Eyni zamanda, alim bu texnologiyanın nəhəng potensial faydalarını da qəbul edirdi. Süni intellekt üzərində uğurlu nəzarətin bəşəriyyətə qlobal yoxsulluğu aradan qaldırmağa, mürəkkəb xəstəlikləri müalicə etməyə və ətraf mühitə dəyən ziyanı geri qaytarmağa kömək edə biləcəyini irəli sürmüşdü.
Hokinq təxminən 100 il ərzində koloniyalaşdırıla biləcək yeni planetlər axtarmağa başlaya biləcəyimizə inanırdı. Həmçinin, o, "yaxın 1000 il ərzində nüvə münaqişəsi və ya ekoloji fəlakətin Yeri iflic edəcəyinə" inandığı üçün bunun mümkün qədər tez edilməli olduğunu düşünürdü.
Stiven Hokinq Aİ süni intellekt