Texnologiya bazarında yeni və mübahisəli bir tendensiya formalaşıb. Müflis olmuş startapların qurucuları keçmiş əməkdaşların iş yazışmalarını süni intellekt hazırlayan şirkətlərə sataraq gəlir əldə edirlər.
Lent.az xarici mediaya istinadla xəbər verir ki, artıq bu sahədə vasitəçi şirkətlərdən ibarət ayrıca ekosistem yaranıb. Bu platformalar bağlanmış startaplara məxsus e-poçt arxivlərini, eləcə də Slack mesajlarını toplayaraq onları süni intellekt modellərinin təlimi üçün satışa çıxarır.
Süni intellekt sahəsində keyfiyyətli və aktual məlumat çatışmazlığı getdikcə daha ciddi problemə çevrilir. Bu səbəbdən real iş mühitini əks etdirən yazışmalar xüsusilə dəyərli hesab olunur. Toplanan məlumatlar əsasında “reinforcement learning” (möhkəmləndirici öyrənmə) üçün xüsusi simulyasiya mühitləri yaradılır. Bu mühitlərdə süni intellekt agentləri ofis tapşırıqlarını yerinə yetirməyi və biznes situasiyalarında qərar verməyi öyrənir.
Böyük texnologiya şirkətləri bu sahəyə ciddi vəsait yatırır. Məsələn, "Anthropic" kimi şirkətlərin bu tip simulyatorların hazırlanmasına bu il təxminən 1 milyard dollar xərcləməyi planlaşdırdığı bildirilir. Məlumata görə, bəzi vasitəçi platformalar artıq yüzə yaxın belə satış əməliyyatı həyata keçirib və müflis startap sahiblərinə ümumilikdə milyonlarla dollar gəlir qazandırıb.
Ekspertlər isə bu tendensiyanın ciddi risklər yaratdığını vurğulayır. Rəqəmsal hüquqlar müdafiəçiləri bildirirlər ki, işçilərin şəxsi və iş yazışmalarının onların razılığı olmadan satılması məxfilik hüququnun açıq pozuntusudur.
Mark Rotenberg qeyd edib ki, bu vəziyyətdə məxfilik problemləri olduqca ciddidir. Onun sözlərinə görə, əgər fiziki ofisdə baş verən söhbətlər qeydə alınıb satılsaydı, bu, açıq şəkildə qanunsuz hesab olunardı.
Bundan əlavə, mütəxəssislər məlumatların “anonimləşdirilməsi” prosesinin də etibarlı olmadığını bildirirlər. Əgər şəxsi məlumatlar düzgün gizlədilməzsə, konkret şəxslərin kimliyini müəyyən etmək mümkün ola bilər. Bu isə gələcəkdə süni intellekt sistemlərinin cavablarında belə məlumatların sızması riskini artırır.
Müzakirələr göstərir ki, süni intellekt texnologiyalarının inkişafı ilə yanaşı, məlumat təhlükəsizliyi və etik normalar məsələsi də getdikcə daha aktual mövzuya çevrilir.
süni intellekt