May ayı İstanbul şəhərinə səyahət üçün ən əlverişli dövrlərdən biri hesab olunur. Bu zaman şəhər artıq baharın canlılığını hiss etdirir, hər tərəf çiçəklənir, lakin yay aylarında olduğu kimi yorucu istilər hələ başlamır. Mütəxəssislərin fikrincə, məhz bu balanslı hava şəraiti və nisbətən sakit mühit turistlər üçün daha rahat istirahət imkanı yaradır.
Lent.az xarici mediaya istinadla xəbər verir ki, bu dövrdə İstanbulda temperatur adətən +20 - +23 dərəcə arasında dəyişir ki, bu da gün boyu şəhəri piyada gəzməyə ideal şərait yaradır.
Axşam saatlarında isə dənizdən gələn sərin meh və çiçək qoxuları şəhərə xüsusi bir atmosfer qatır. Eyni zamanda, küləkli hava səbəbindən yüngül üst geyim götürmək tövsiyə olunur.
May ayında şəhərdə turist sıxlığı yay aylarına nisbətən daha az olur. Bu isə məşhur tarixi məkanlara uzun növbələr gözləmədən daxil olmaq imkanı yaradır.
İstanbulu fərqli hiss etmək üçün boğaz üzərində gəmi gəzintisi xüsusi tövsiyə olunur. Bu dövrdə dəniz daha parlaq görünür, hava isə açıq və təmiz olur. Turistlər tez-tez Kadıköy kimi ərazilərə üz tutaraq həm yerli mətbəxi dadır, həm də şəhərin daha sakit ritmini yaşayırlar. Balat məhəlləsi isə rəngli evləri və özünəməxsus küçələri ilə xüsusilə diqqət çəkir.
Mütəxəssislər bildirir ki, 3-4 günlük səfərlər belə insanın psixoloji vəziyyətinə müsbət təsir göstərə bilər. Gündəlik stresdən uzaqlaşmaq, dəniz səsləri və sakit mühit insanın emosional balansını bərpa etməyə kömək edir. Bundan əlavə, may ayında otel qiymətləri hələ yay səviyyəsinə çatmır, şəhər isə çiçəklərlə örtüldüyü üçün daha cəlbedici görünür.
İstanbul səyahət travel