Latın Amerikası və Karib hövzəsi planetin ən çox şəhərləşmiş regionları sırasında yer alır, eyni zamanda ən qeyri-bərabər regionlardan biridir.
"Report"un məlumatına görə, bu barədə Uruqvayın mənzil tikintisi və ərazi planlaşdırması naziri Tamara Paseyro Ümumdünya Şəhərsalma Forumunun 13-cü sessiyası (WUF13) çərçivəsində Latın Amerikası və Karib hövzəsi ölkələrinin mənzil tikintisi və şəhərsalma məsələləri üzrə nazirləri və yüksək vəzifəli şəxslərinin forumunda (MINURVI) bəyan edib.
"Bu qeyri-bərabərlik aydın ərazi ölçüsünə malikdir: o, mənzilə, torpaq resurslarına, infrastruktura, nəqliyyat sisteminə, ictimai məkanlara və şəhər imkanlarına çıxışı əhatə edir. Bu səbəbdən biz qəti şəkildə inanırıq ki, mənzil məsələsinə yalnız məhdud sahəvi siyasət kimi baxıla bilməz. Onu mərkəzi istiqamət – bütün digər sosial və iqtisadi tədbirlərin səmərəliliyinin asılı olduğu siyasət kimi qəbul etmək lazımdır. Məhz buna görə bu regional platforma bu qədər böyük əhəmiyyətə malikdir", – nazir bildirib.
O qeyd edib ki, MINURVI hazırda regional xüsusiyyətləri, mövcud qeyri-bərabərliyi, eləcə də mövcud potensialı nəzərə alan Latın Amerikası və Karib şəhər gündəliyinin təşviqinə töhfə vermək imkanına malikdir və buna görə məsuliyyət daşıyır.
"Bu gündəliyin mərkəzində mənzil hüququ, ərazi inteqrasiyası, iqlim dayanıqlığı, torpaq resurslarına çıxış və şəhər qeyri-bərabərliyinin aradan qaldırılması məsələləri durur. Bu kontekstdə hazırkı iclas müstəsna siyasi və strateji əhəmiyyətə malikdir. O, aprel ayında plenar iclas çərçivəsində başlamış fəaliyyəti davam etdirməyə, tematik işçi qruplarının yaradılmasında irəliləməyə və milli hökumətlər, yerli hakimiyyət orqanları və beynəlxalq təşkilatlar arasında qarşılıqlı əlaqəni gücləndirməyə imkan verəcək. Bundan başqa, bu, qarşıdan gələn qlobal prosesləri nəzərə alaraq Latın Amerikası və Karib hövzəsi ölkələrinin birgə gündəliyini müəyyən etmək üçün bir fürsət olacaq", – T.Paseyro vurğulayıb.