Bir çox insan düşünür ki, nə qədər çox vitamin qəbul etsə, bir o qədər faydalıdır. Buna görə də onlar vitaminləri hansı kombinasiyada qəbul etdiklərinə çox fikir vermirlər. Amma orqanizm bu cür “təcrübələrə” həmişə müsbət reaksiya vermir.
Lent.az xarici mediaya istinadən xəbər verir ki, bəzi vitaminlər həqiqətən də bir-birinin mənimsənilməsinə mane olur. Buna görə də bahalı vitamin kompleksləri belə qablaşdırmada vəd edilən qədər effektiv olmaya bilər.
Ən məşhur uyğun gəlməyən kombinasiyalardan biri B1 vitamini və B6 vitamini hesab olunur. Onlar eyni vaxtda qəbul edildikdə, B6 vitamini B1-in təsirini zəiflədə və onun faydasını azalda bilər.
Həmçinin B12 vitamini ilə C vitaminini birlikdə qəbul etmək də məsləhət görülmür. Askorbin turşusu B12 vitamininin bir hissəsini parçalaya bilər, xüsusilə də onlar eyni məhlulda olduqda.
Yağda həll olunan A vitamini və E vitamini də bir-biri ilə “rəqabətə” girə bilər. Bu vitaminlərdən birinin normadan artıq olması digərinin mənimsənilməsini azalda bilər.
K vitamini yüksək dozada E vitamini ilə yaxşı uyğunlaşmır. E vitamini K vitamininin qanın laxtalanmasına təsirini zəiflədə bilər.
Kalsium və Dəmir də uyğun gəlməyən cütlüklərdən biridir. Kalsium dəmirin mənimsənilməsinə mane olur, buna görə də onların fərqli vaxtlarda qəbul edilməsi tövsiyə olunur.
Fosfor və Maqnezium arasında da uyğunsuzluq ola bilər. Fosforun artıq olması maqneziumun mənimsənilməsini zəiflədir.
Sink və Mis də bir-biri ilə tam uyğun sayılmır. Uzun müddət sink qəbul edildikdə orqanizmdə mis səviyyəsi azala bilər.
Amma faydalı kombinasiyalar da mövcuddur. Məsələn, D vitamini kalsiumun daha yaxşı mənimsənilməsinə kömək edir. C vitamini isə dəmirin orqanizm tərəfindən daha effektiv qəbul olunmasını artırır.
Mütəxəssislər bildirirlər ki, bu cür problemlər əsasən yüksək dozada əlavələr qəbul edilərkən yaranır. Adi qidalanma zamanı belə hallar nadir müşahidə olunur.
Lakin vitamin əlavələri istifadə edilərkən həkim tövsiyələrinə əməl etmək vacibdir. Xüsusilə də uzunmüddətli qəbul zamanı.
Bəzi istehsalçılar artıq bu uyğunsuzluqları nəzərə alaraq vitaminləri səhər və axşam kapsulları şəklində ayırırlar. Bu, maddələrin bir-birinə mane olmasının qarşısını almağa kömək edir.
Əgər insan bir neçə əlavə qəbul edirsə, onları həkimlə məsləhətləşərək seçməsi daha məqsədəuyğundur. Bu həm səhv riskini azaldır, həm də effektivliyi artırır.
bir-birinə uyğun gəlməyən vitaminlərMənbə: lent.az