WUF13 çərçivəsində təşkil edilən və "Dayanıqlı şəhərlərin gələcəyində süni intellekt" mövzusuna həsr olunan beynəlxalq gənclər müsabiqəsinə 30-dan çox ölkədən iştirakçılar tərəfindən 285-dən artıq müraciət daxil olub.
"Report" xəbər verir ki, bu barədə İslam Əməkdaşlıq Təşkilatı (İƏT) Gənclər Forumunun Avrasiya üzrə Regional Mərkəzinin (ICYF ERC) layihə meneceri və İƏT Tələbə Assosiasiyasının əlaqələndiricisi Momina Mehdi Bakıda Ümumdünya Şəhərsalma Forumunun 13-cü sessiyası (WUF13) çərçivəsində keçirilən "Qeyri-sabit və münaqişələrdən zərər çəkmiş ərazilərdə şəhər həlləri vasitəsilə iqlimə sülhyönümlü müsbət təsir" adlı panel sessiyasında bildirib.
"Müsabiqənin əsas vəzifəsi dayanıqlı şəhər inkişafı, iqlimə uyğunlaşma və rəqəmsal transformasiya sahələrində süni intellekt texnologiyalarının tətbiqi ilə gənclərin innovativ işləmələrini cəlb etmək idi. Bu təşəbbüs BMT-nin 9-cu (sənaye, innovasiyalar və infrastruktur), 11-ci (dayanıqlı şəhərlər və icmalar), 13-cü (iqlim tədbirləri) və 17-ci (tərəfdaşlıq) Davamlı İnkişaf Məqsədlərinin həyata keçirilməsinə dəstək verir. Müsabiqədə iştirak üçün müraciətlər bütün dünya üzrə 75-dən çox şəhərin nümayəndələri tərəfindən göndərilmişdir", - o qeyd edib.
Mənbə: report.az