İtaliyanın "Napoli" klubunun baş məşqçisi Antonio Konte mövsümün sonunda vəzifəsindən ayrılacaq.
"Report" xəbər verir ki, bu barədə tanınmış insayder Fabritsio Romano məlumat yayıb.
A Seriyasında mövsümün başa çatmasına bir tur qalmış "Napoli" turnir cədvəlində ikinci pillədə qərarlaşıb. Neapol təmsilçisi çempionluq şansını itirsə də, UEFA Çempionlar Liqasına vəsiqəni təmin edib.
56 yaşlı mütəxəssis 2024-cü ildən "Napoli"ni çalışdırır. Onun rəhbərliyi altında komanda İtaliya çempionu olub və Ölkə Superkubokunu qazanıb.
Antonio Konte daha əvvəl "Yuventus"la üç dəfə A Seriyasının qalibi olub. O, həmçinin "İnter"i bir dəfə ölkə çempionluğuna daşıyıb. İtaliyalı baş məşqçi İngiltərənin "Çelsi" klubu ilə Premyer Liqa və İngiltərə Kubokunun qalibi adını qazanıb.
Mənbə: report.az