Mənzil sosial həmrəyliyi gücləndirən rıçaqdır.
"Report" xəbər verir ki, bunu Uruqvayın mənzil və ərazi planlaşdırılması naziri Tamara Paseyro Marin Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində təşkil olunmuş "Mənzil Maliyyələşdirilməsi üçün Yeni Razılaşma" adlı tədbirdə bildirib.
"Bizim üçün mənzil siyasətini bir "ox siyasət" (və ya rıçaq siyasəti) kimi anlamaq da vacibdir. Yəni, bu siyasət özlüyündə bir son məqsəd deyil, digər siyasətlərə də ehtiyac duyur və o, sosial həmrəylik, eləcə də imkanları bərabərləşdirmək üçün bir rıçaqdır. Bu, digər hüquqların reallaşmasına imkan yaradan bir hüquqdur. Həmçinin, forum boyu bu günlərdə tez-tez eşitdiyimiz bir məqamı - icmalara səs verməyin vacibliyini vurğulamaq istərdim. İcmalara səs vermək dedikdə nə nəzərdə tutulur? Çünki belə deyəndə qulağa çox xoş gəlir, bəs buna necə nail oluruq? Biz buna nail olmalıyıq və özümüzə konkret müdaxilə metodologiyaları hədəf qoymalıyıq.
Məsələn, sizə Uruqvaydan bir nümunə çəkmək üçün: biz layihələrdə, məhəllələrin abadlaşdırılması üzrə müxtəlif proqramlarda icmalarla birlikdə komissiyalar yaradırıq. Bu komissiyalara texniki qruplar, müxtəlif məhəllələrdə çalışan tikinti şirkətləri və icmaların özləri daxildir. Çünki başa düşürük ki, obyektiv məsələlər də var; bəli, kanalizasiya xətti bir yerdən keçir, işıqlandırma və yol infrastrukturu da müəyyən bir yerdən keçir. Lakin bundan sonra icma ilə birlikdə işlənilməsi vacib olan digər amillər də ortaya çıxır. torpaq, dövlət-özəl maliyyələşməsi və institusional potensialdan ibarət bu üç ölçünü icmaları da nəzərə alaraq idarə etmək, məncə, bizim qazandığımız ən böyük təcrübə və dərsdir", - deyə o qeyd edib.
Mənbə: report.az