Dayanıqlı İnkişaf Məqsədləri (DİM) üzrə hazırlanmış alətlər təhsil prosesində tətbiq olunacaq.
"Report" xəbər verir ki, bunu İspaniyanın Kataloniya Hökumətinin Ərazi, Mənzil və Ekoloji Keçid Departamentində Şəhərsalma və Memarlıq üzrə Baş Direktoru Elisabet Cirici Amiell Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində təşkil olunmuş "Dayanıqlı İnkişaf Məqsədlərindən Mənzillərə" adlı tədbirdə bildirib.
"Şəhərlərlə bağlı ibtidai və orta təhsil səviyyəsində həyata keçirilən təşəbbüslərdə bu alətlərdən istifadə DİM-lərin və dayanıqlı inkişaf prinsiplərinin daha praktik şəkildə izahına imkan yarada bilər", - deyə o qeyd edib.
Qonaq əlavə edib ki, Beynəlxalq Memarlar İttifaqının (UIA) hazırladığı alət peşəkarlar arasında ortaq yanaşmanın formalaşdırılmasına və layihələrin daha dayanıqlı hazırlanmasına kömək edir: "Bu alət kommunikasiya və təşviqat baxımından çox faydalıdır. Eyni zamanda layihələrin hazırlanması prosesində onların keyfiyyətinin yaxşılaşdırılmasına imkan yaradır. İstifadəçilər alətlə interaktiv formada işləyərək müxtəlif parametrləri dəyişə və layihələrin nəticələrini qiymətləndirə bilirlər. Layihələrin hazırlanması zamanı müəyyən kompromislər olur. Lakin bu alət həmin prosesdə qərarların daha balanslı verilməsinə kömək edir".
Mənbə: report.az