Mütəxəssislər 2026-cı ilin ev və mənzil üçün ən yaxşı Wi-Fi routerini açıqlayıblar. Gözlənilənin əksinə olaraq, siyahının zirvəsində nə TP-Link, nə də Netgear yer alıb.
Lent.az xəbər verir ki, Consumer Reports tərəfindən aparılan son testlərin nəticələrinə əsasən, ən yüksək qiyməti premium seqmentə aid Asus ROG Strix GS-BE12000 modeli qazanıb.
Ekspertlərin fikrincə, ənənəvi təkbloklu Wi-Fi routerlər mesh sistemlərinin populyarlığına baxmayaraq, hələ də əksər istifadəçilər üçün ən optimal seçim olaraq qalır. Onlar daha sadə quraşdırılır, daha münasib qiymətə başa gəlir və evdə sabit internet bağlantısı təmin edir.
Testlər göstərib ki, Asus ROG Strix GS-BE12000 saniyədə 12 000 Mbit-ə qədər məlumat ötürmə sürətini dəstəkləyir. Router eyni anda 2,4 GHz, 5 GHz və 6 GHz olmaqla üç tezlik diapazonunda işləyir ki, bu da qoşulmuş cihazlar arasında yükün daha səmərəli bölüşdürülməsinə və gecikmələrin minimuma enməsinə imkan verir.
Model səkkiz daxili antena, 2,0 GHz tezlikli prosessor və 2 GB operativ yaddaşla təchiz edilib. Bu texniki göstəricilər routerin təxminən 280 kvadratmetrədək ərazini sabit Wi-Fi siqnalı ilə əhatə etməsinə imkan verir.
Routerdə oyun kompüterləri, konsollar və şəbəkə yaddaş qurğularını qoşmaq üçün yeddi 2,5 Gbit/s sürətli Ethernet portu, həmçinin xarici yaddaş daşıyıcıları üçün USB 3.0 girişi mövcuddur. Consumer Reports mütəxəssisləri cihazın həm yaxın, həm də uzaq məsafələrdə sabit işləməsini, geniş qoşulma imkanlarını və 36 aylıq zəmanətini yüksək qiymətləndiriblər.
Bundan əlavə, istehsalçı soyutma sisteminə də xüsusi diqqət yetirib. Routerin korpusu istiliyin effektiv şəkildə xaric olunmasını təmin edir və uzunmüddətli yüklənmə zamanı həddindən artıq qızma riskini azaldır. Ekspertlər vurğulayırlar ki, Asus ROG Strix GS-BE12000 premium seqmentə aid modeldir və maksimum performans, yüksək sürət və sabit bağlantı axtaran istifadəçilər üçün nəzərdə tutulub.
texno router Wi-FiMənbə: lent.az