Bir çox insan elektrik enerjisinə qənaət etmək və ya cihazın ömrünü uzatmaq məqsədilə gecələr Wi-Fi routerini söndürür. Lakin mütəxəssislər hesab edirlər ki, bu vərdiş əksər hallarda heç bir ciddi fayda vermir.
Lent.az xarici mediaya istinadən xəbər verir ki, elektronika və telekommunikasiya sahəsi üzrə mütəxəssislərin sözlərinə görə, müasir Wi-Fi routerləri sutka ərzində fasiləsiz işləmək üçün hazırlanıb və çox az elektrik enerjisi sərf edir, buna görə də cihazın gecə boyu işlək vəziyyətdə qalması kommunal xərclərə nəzərəçarpacaq təsir göstərmir.
Ekspertlər routerlərin həddindən artıq qızması ilə bağlı narahatlıqların da əksər hallarda əsassız olduğunu bildirirlər. Normal istismar şəraitində cihazın temperaturla bağlı problem yaşaması gözlənilmir. Yalnız router havasız, qapalı məkanda yerləşdirildikdə və ya birbaşa günəş şüalarına məruz qaldıqda həddindən artıq qızma riski yarana bilər.
Mütəxəssislər onu da vurğulayırlar ki, məişətdə istifadə olunan Wi-Fi routerlərinin yaydığı elektromaqnit şüalanması çox aşağı səviyyədədir və insan sağlamlığı üçün təhlükə yaratmır. Bu göstərici gündəlik istifadə olunan bir çox digər məişət cihazlarından da aşağıdır.
Bununla yanaşı, routerin tez-tez söndürülüb yenidən işə salınması elektron komponentlərə və enerji blokuna əlavə yük yarada bilər. Uzunmüddətli perspektivdə bu, cihazın bəzi hissələrinin daha tez köhnəlməsinə səbəb ola bilər.
Mütəxəssislərin fikrincə, routeri yalnız müəyyən hallarda söndürmək məqsədəuyğundur. Məsələn, cihazın həddindən artıq qızdığı müşahidə olunarsa və ya ev sahibləri uzun müddət evdə olmayacaqlarsa, routeri söndürmək tövsiyə edilir. Digər hallarda isə onu günün 24 saatı işlək vəziyyətdə saxlamaq təhlükəsiz hesab olunur.
texno modem routerMənbə: lent.az