Dünyada həyat tərzinin dəyişməsi ilə tək yaşayan insanların sayı artır. Xüsusilə inkişaf etmiş ölkələrdə fərdi həyat tərzinə üstünlük verənlərin sayı ildən-ilə yüksəlir.
Lent.az xarici mediaya istinadla xəbər verir ki, mütəxəssislərin fikrincə, bu tendensiyanın əsas səbəbləri sosial rifah sisteminin inkişafı, əhalinin qocalması, nikah yaşının artması və insanların təhsil və karyeraya daha çox önəm verməsidir.
Tək yaşayanların ən çox olduğu 10 ölkə
1. İsveç – 47 faiz
Siyahıya İsveç başçılıq edir. Ölkə əhalisinin təxminən 47 faizi tək yaşayır. Güclü sosial təminat sistemi, münasib mənzil imkanları və müstəqil həyat tərzini dəstəkləyən siyasət bu göstəricinin yüksək olmasına səbəb olur. Əhalinin yaşlanması və ailələrin kiçilməsi də mühüm amillər sırasındadır.
2. Böyük Britaniya – 34 faiz
Böyük Britaniyada əhalinin 34 faizi tək yaşayır. Evlənmə yaşının yüksəlməsi, fərdi həyat tərzinə marağın artması və sosial dəstək mexanizmləri bu göstəriciyə təsir edən əsas səbəblər hesab olunur.
3. Yaponiya – 31 faiz
Yaponiyada tək yaşayanların payı 31 faizə çatır. Aşağı doğum səviyyəsi, əhalinin sürətlə qocalması və kiçik ailə modelinin geniş yayılması bu tendensiyanı gücləndirir.
4. İtaliya – 29 faiz
Ənənəvi ailə dəyərləri ilə tanınan İtaliyada da tək yaşayanların sayı artır. Yaşlı insanların müstəqil yaşamağı seçməsi və gənclərin iş səbəbindən başqa şəhərlərə köçməsi bu artımda mühüm rol oynayır.
5. ABŞ – 28 faiz
ABŞ-da əhalinin 28 faizi tək yaşayır. Karyera və şəxsi inkişafın ön plana çıxması, ailə qurma yaşının yüksəlməsi və fərdi həyat tərzi bu göstəricinin artmasına səbəb olub.
6. Kanada – 27 faiz
Kanadada yüksək həyat səviyyəsi və güclü iqtisadiyyat insanların müstəqil yaşamasını asanlaşdırır. Xüsusilə iri şəhərlərdə tək nəfərlik ev təsərrüfatlarının sayı artır.
7. Rusiya – 25 faiz
Rusiyada əhalinin 25 faizi tək yaşayır. Karyera yönümlü həyat tərzi, evlilik yaşının artması və iqtisadi çətinliklər bu göstəriciyə təsir edən amillər arasında göstərilir.
8. Cənubi Afrika – 24 faiz
Cənubi Afrikada tək yaşayanların payı 24 faizə çatır. İşsizlik, iqtisadi vəziyyət və dəyişən sosial münasibətlər fərdi həyat tərzinin yayılmasına təsir edir.
9. Keniya – 15 faiz
Keniyada əhalinin 15 faizi tək yaşayır. Əhalinin yaşlanması, iqtisadi çətinliklər və ailə modelindəki dəyişikliklər bu göstəricinin yüksəlməsinə səbəb olur.
10. Braziliya – 10 faiz
Siyahının son sırasında Braziliya qərarlaşıb. Burada əhalinin 10 faizi tək yaşayır. Gənclərin karyera və maliyyə sabitliyinə üstünlük verməsi ailə qurma yaşını gecikdirir və tək yaşayanların sayını artırır.
Türkiyədə isə 2025-ci ildə ölkədə tək yaşayan insanların sayı 5 milyon 523 min 321 nəfərə çatıb. Son 10 ildə bu göstərici 66,5 faiz artıb.
Dünya dünyadan xəbərlər tək yaşayanlarMənbə: lent.az