Bəzi filmlərdə qəhrəmanlar gözlənilmədən adi həyatın qanunlarının keçərli olmadığı sirli dünyalara düşürlər. Bu aləmlərdə onları həm təhlükəli macəralar, həm də cəsarət, diqqət və düzgün seçim tələb edən çətin sınaqlar gözləyir.
Lent.az ən maraqlı sehrli filmləri təqdim edir:
"Labyrinth" (1986)
Film maraqlı süjet xətti ilə ilk dəqiqələrdən diqqət çəkməyi bacarır. Belə ki, gənc bir qız evdə balaca uşağa baxarkən əsəbiləşib heç vaxt dilə gətirilməməli olan bir arzunu səsləndirir. Bundan sonra nağıl məxluqları körpəni aparır və ona qısa müddət ərzində nəhəng labirintdən çıxmağı tapşırırlar. Əks halda uşaq qoblinlər krallığında qalacaq. Bu dünyada hər şey aldatma, illüziya və qəribə məntiq üzərində qurulub. Qapılar gözlənilməz yerə aparır, dost düşmənə çevrilə bilər, doğru yol isə bəzən səhv kimi görünür.
"Stardust" (2007)
Kiçik bir İngiltərə kəndində qadağan olunmuş torpaqları adi dünyadan ayıran divar var. Gənc bir oğlan sevdiyi qıza hisslərinin səmimiliyini sübut etmək üçün göydən düşən ulduzu gətirəcəyinə söz verir və həmin sərhədi keçir. Lakin qarşısına cadugərlərin, saray intriqalarının, hava quldurlarının və qiymətsiz hesab olunan bir xəzinənin uğrunda mübarizə aparanların yaşadığı sehrli dünya çıxır.
"The Forbidden Kingdom" (2008)
Döyüş sənətləri filmlərinin həvəskarı olan amerikalı yeniyetmə köhnə bir əsanı tapdıqdan sonra qədim Çinin fantastik versiyasına düşür. Burada filmlərdən öyrəndikləri heç nəyə yaramır. O, əfsanələrin hökm sürdüyü bir dünyadan evə qayıtmağın yolunu axtarmalı olur.
"Alice in Wonderland" (2010)
Bu film də öz süjet xətti ilə seçilir. Darıxdığı zaman ağ dovşan görən gənc qız onun arxasınca gedərək möcüzələr aləminə düşür. Burada qəddar kraliça hökmranlıq edir, məntiq demək olar ki, işləmir və hər söhbət gizli tələyə çevrilə bilər. O, bu diyardan qayıtmaq üçün ilk növbədə kim olmaq istədiyini anlamalıdır.
"Jumanji: Welcome to the Jungle" (2017)
Cəza alan dörd yeniyetmə köhnə videooyun konsolunu işə saldıqdan sonra oyunun içinə düşür. Onlar seçdikləri oyun personajlarının bədənində oyanırlar. Cəngəllik isə oyun qaydaları ilə idarə olunur: səviyyələr, ipucları, təhlükəli heyvanlar, tələlər və məhdud sayda həyat. Bu dünyadan çıxmaq heç də asan deyil.
"The Spiderwick Chronicles" (2008)
Yeni evə köçən ailə əvvəlcə qəribə hadisələrin adi təsadüf olduğunu düşünür. Əşyalar yoxa çıxır, divarlardan səslər gəlir və evin ətrafında görünməz həyatın mövcud olduğu hiss edilir. Uşaqlar qədim bir kitab tapdıqdan sonra anlayırlar ki, insanların yanında gizli yaşayan sirli varlıqlar həqiqətən mövcuddur.
"Oz the Great and Powerful" (2013)
Sirk fokusçusu qasırğaya düşərək fərqli aləmə gəlir. Burada onu təsadüfi qonaq yox, qədim əfsanələrin qəhrəmanı hesab edirlər. İlk baxışdan şöhrət və var-dövlət vəd edən bu aləmdə əslində hakimiyyət uğrunda mübarizə gedir və qəhrəman tezliklə anlayır ki, fokusları onu xilas etməyə də bilər.
"The Nutcracker and the Four Realms" (2018)
Anasını itirən gənc qız onun son hədiyyəsini açmaq üçün xüsusi açar axtarmağa başlayır. Bu axtarış onu adi otağa deyil, sirli krallığın mövcud olduğu gizli dünyaya aparır.
"Pan" (2015)
Uşaq evində böyüyən oğlan gözlənilmədən fərqli dünyaya düşür. Uçan gəmilər, quldurlar, tayfalar və təhlükələrlə dolu bu aləmdə o, nağıl qəhrəmanı kimi deyil, əsir kimi yaşayır. Qarşısında duran ilk vəzifə isə harada olduğunu və taleyinin niyə bu yerlə bağlı olduğunu öyrənməkdir.
reallıq film sehrMənbə: lent.az