ABŞ Kubanın beş təşkilatına və səkkiz fiziki şəxsə qarşı sanksiyalar tətbiq edib, Vaşinqton onları Havananın hərbi əlaqələrinə kömək etməkdə və Kubanın güc strukturları üçün silah tədarükündə ittiham edir.
"Report" xəbər verir ki, bu barədə ABŞ dövlət katibi Marko Rubio "X" sosial şəbəkəsində bildirib.
"Bu gün mən rejim üçün silah alışı ilə əlaqəli beş Kuba təşkilatına və səkkiz şəxsə qarşı sanksiyalar tətbiq etdim", - Rubio yazıb.
Onun sözlərinə görə, Kuba rəhbərliyi ABŞ-nin milli təhlükəsizliyi üçün təhdid yaradır, çünki hərbi və kəşfiyyat strukturlarından Birləşmiş Ştatlara qarşı casusluq, radikal qrupların dəstəklənməsi və Rusiya, Çin və İranla əməkdaşlıq üçün istifadə edir.
Rubio qeyd edib ki, sanksiyalar ABŞ Prezidenti Donald Trampın 1 may 2026-cı il tarixli "Kubada repressiyalara görə məsul şəxslərə və ABŞ-nin milli təhlükəsizliyinə və xarici siyasətinə təhdidlərə qarşı sanksiyaların tətbiqi haqqında" fərmanına uyğun olaraq tətbiq olunub.
Dövlət katibi xəbərdarlıq edib ki, sanksiyalara məruz qalan strukturlara dəstək göstərən, onları maliyyələşdirən və ya xidmət təqdim edən istənilən şəxs və təşkilatlar da məhdudiyyət tədbirləri ilə üzləşə bilər.
O, həmçinin xarici bankları və şirkətləri bu təşkilatlara xidmət göstərməyi dayandırmağa və onların vəsaitləri ilə əməliyyatlara yol verməməyə çağırıb.
Daha əvvəl ABŞ Dövlət Departamentində bildirilib ki, Kuba hərbi və kəşfiyyat strukturları daxili nəzarətin təmin edilməsində və hərbçilərə tabe olan "Grupo de Administración Empresarial S.A." (GAESA) konqlomeratının fəaliyyətində əsas rol oynayır.
Mənbə: report.az