Ulduzun rəqəmsal obrazından istifadə qərarı şəbəkədə heyranlıqdan tutmuş kəskin tənqidə qədər müxtəlif reaksiyalara səbəb olub.
2025-ci ilin aprelində vəfat edən Hollivud aktyoru Val Kilmer, müasir süni intellekt (Sİ) texnologiyaları sayəsində böyük ekranlara "qayıdacaq".
Lent.az xarici mediaya istinadla xəbər verir ki, söhbət aktyorun sağlığında çəkilməli olduğu, lakin səhhətinin pisləşməsi səbəbindən iştirak edə bilmədiyi "As Deep as the Grave" (Qəbir qədər dərin) filmindən gedir.
Prodüserlər onun son rolunu generativ süni intellekt vasitəsilə reallaşdırmaq qərarına gəliblər. Aktyorun həyatının müxtəlif dövrlərinə aid arxiv videoları və şəkillərindən istifadə olunub. Ailəsi tərəfindən təqdim edilən materiallar emal edilib. Kilmer filmdə rahib və mənəvi ustad olan Ata Fintan obrazında çıxış edəcək.
Layihənin rejissoru Koerte Vurhis etiraf edib ki, əvvəlcə aktyoru ölümündən sonra "canlandırmaq" ideyasına skeptik yanaşıb. Lakin Kilmerin ailəsinin mövqeyi həlledici olub; yaxınları bu filmin onun üçün çox vacib olduğunu və bu rolu həqiqətən oynamaq istədiyini vurğulayıblar.
Xəbər pərəstişkarlar arasında böyük rezonans doğurub. Auditoriyanın bir hissəsi bu təşəbbüsü əfsanəvi aktyorun irsini qorumaq imkanı kimi dəyərləndirərək dəstəkləyib. Digərləri isə vəfat etmiş insanların "təkrar istehsalı" üçün Sİ-dən istifadəni qeyri-etik və kino sənayesi üçün təhlükəli presedent hesab edərək kəskin tənqid ediblər.
Sosial şəbəkə istifadəçiləri bu növ təcrübələrin qadağan edilməsi və ya dəqiq qaydaların yaradılması üçün çağırışlar edirlər.
Val Kilmer süni intellekt ai Hollivud