Sosial şəbəkələrdə bir qadının həyat yoldaşı ilə bağlı paylaşdığı hekayə geniş müzakirələrə səbəb olub. Qadın ərinin illərlə davam edən bir vərdişinə görə boşanmaq barədə düşündüyünü bildirib və bu məsələ qısa zamanda internetdə gündəm mövzuya çevrilib.
Lent.az-ın xarici mediaya istinadən xəbərinə görə, qadını narahat edən əsas məsələ ərinin tualetə getdikdən sonra demək olar ki, heç vaxt tualet kağızı rulonunu dəyişməməsidir.
Onun sözlərinə görə, kişi kağızı elə səviyyədə saxlayır ki, dəyişmək məcburiyyətində qalmasın və bu məsuliyyəti daim həyat yoldaşının üzərinə qoyur. Qadın bildirib ki, bu məsələni dəfələrlə müzakirə etsə də, heç bir dəyişiklik olmayıb və bu, artıq ciddi əsəb gərginliyi yaradır.
Məsələ ilə bağlı paylaşım sosial platformalarda qısa müddətdə minlərlə istifadəçi tərəfindən şərh olunub. İstifadəçilərin fikirləri isə birmənalı olmayıb: bəziləri belə səbəbə görə boşanmağın doğru olmadığını desə də, digərləri hesab edir ki, məhz bu cür kiçik görünən məsələlər münasibətlərdə daha böyük problemlərin başlanğıcıdır.
Mütəxəssislər də bildirirlər ki, ailədaxili gərginlik çox vaxt böyük problemlərdən deyil, məhz bu cür təkrarlanan xırda davranışlardan yaranır. Onların fikrincə, məsələ təkcə tualet kağızı deyil, daha çox qarşı tərəfin səni öz-özünə başa düşülən kimi qəbul etməsi hissidir. Bu isə zamanla hörmət və diqqət çatışmazlığı kimi qəbul edilə bilər.
ev cütlük ailə