Banqladeş Bakıda keçirilən Ümumdünya Şəhərsalma Forumunda (WUF13) şəhər planlaşdırması sahəsində itkin düşmüş və həssas uşaqların hüquqlarını nəzərə alacaq qərarları təşviq etməyə çağırıb.
"Report" xəbər verir ki, bu bəyanatla Banqladeş nümayəndəsi Vicay Çaudhari WUF13-ün Uşaq və Gənclər Assambleyasının açılışında çıxış edib.
Onun sözlərinə görə, uşaq üçün təhlükəsiz ev sadəcə yaşayış yeri deyil, sağlamlıq, təhsil və layiqli həyatın əsasıdır:
"Təhlükəsiz və yaşayış üçün yararlı ev olmadan uşaq sağlam qala bilməz. Başının üzərində dam olmadan o, əsas hüquqlara - təmiz su, gigiyena və sanitariyaya çıxış əldə edə bilməyəcək".
V.Çaudhari vurğulayıb ki, iqlim baxımından həssas icmalardan olan uşaqlar hər gün iqlim dəyişikliyinin fəsadları ilə üzləşirlər: "Daşqınlar zamanı və s. məhz uşaqlar öz hüquqlarını ilk itirənlər olurlar".
Banqladeşli nümayəndə qeyd edib ki, uşaqlar və gənclər şəhər inkişafı sahəsində qərar qəbuletmə prosesinin tamhüquqlu iştirakçıları olmalıdırlar: "Görüşlərə yalnız formal iştirak xatirinə dəvət edilməyimizi istəmirik. İstəyirik ki, şəhərlərin, sistemlərin və siyasətin hazırlanması zamanı bizim fikirlərimiz ciddiyə alınsın".
Onun sözlərinə görə, Assambleya iştirakçıları WUF13-ün uşaqlar və gənclərin real hərəkətləri üçün başlanğıc nöqtəsi olacağını gözləyirlər.
V.Çaudhari, həmçinin, xüsusilə inkişaf etməkdə olan ölkələrdə gənclərin təşəbbüslərini dəstəkləmək üçün beynəlxalq əməkdaşlığın vacibliyini vurğulayıb: "Banqladeşdən və ya dünyanın istənilən ölkəsindən olmağımız fərq etmir - biz sadəcə bizə yaşayış yeri verən deyil, həm də bizi dəstəkləyən şəhərlərə layiqik".