Asiya İnfrastruktur İnvestisiya Bankı (AIIB) əlçatan mənzillə təminat problemini aradan qaldırmaq üçün üç əsas prioritet istiqamət müəyyən edib.
"Report" xəbər verir ki, bunu AIIB-nin tərəfdaşlıq üzrə baş mütəxəssisi Pin Yen Çea Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində təşkil olunmuş "Qlobal Mənzil Maliyyələşdirməsindən Yerli Əlverişli Mənzil Fəaliyyətinə: Qlobal İnkişafdan və Submilli Maliyyədən İstifadə" adlı panel müzakirəsində bildirib.
"Əlçatan mənzillərin maliyyələşdirilməsini əngəlləyən üç əsas maneə mövcuddur: maliyyələşdirmə almaq üçün tələblərə cavab verən layihələrin çatışmazlığı, onların hazırlanması mərhələsində dəstəyin kifayət qədər olmaması, eləcə də özəl kapitalın səfərbər edilməsi alətlərinin - qarışıq maliyyələşdirmə, zəmanət mexanizmləri və kredit keyfiyyətinin artırılması vasitələrinin məhdud tətbiqi", - o vurğulayıb.
Mənbə: report.az