Diş ağrısı qəfil başlayanda stomatoloqa gedənə qədər ağrını azaltmaq üçün sadə üsullardan istifadə etmək mümkündür.
Lent.az xarici mediaya istinadla bildirir ki, mütəxəssislərin sözlərinə görə, ilıq duzlu su ilə ağız yaxalamaq diş ağrısını müvəqqəti yüngülləşdirən ən təsirli ev üsullarından biridir.
Duzlu su niyə kömək edir?
Qida qalıqlarını təmizləyir
Bəzən diş ağrısına dişlərin arasında və ya kariyes boşluğunda qalan qida hissəcikləri səbəb olur. Duzlu su həmin qalıqları yuyaraq sinirlərin və diş ətlərinin qıcıqlanmasını azalda bilər.
Şişkinliyi azaldır
Duz artıq mayeni toxumalardan çəkərək iltihab və şişkinliyin azalmasına kömək edir.
Bakteriyaların çoxalmasını ləngidir
Duzlu su antibiotik olmasa da, bakteriyaların çoxalması üçün əlverişsiz mühit yaradır və bu da ağrının qismən azalmasına kömək edə bilər.
Məhlul necə hazırlanır?
200-250 ml ilıq (isti olmayan) su götürün.
İçərisinə 1 çay qaşığı duz əlavə edib tam həll olana qədər qarışdırın.
Məhlulu təxminən 30 saniyə ağızda saxlayaraq, xüsusilə ağrıyan diş olan hissəni yaxalayın.
Məhlulu tüpürün və lazım gələrsə proseduru gündə bir neçə dəfə təkrarlayın.
Unutmayın
Duzlu su ilə yaxalama yalnız ilk yardım üsuludur və ağrının səbəbini aradan qaldırmır. Diş ağrısının səbəbi kariyes, pulpit, periodontit və ya diş əti iltihabı ola bilər.
Ağrı davam edərsə və ya güclənərsə, mütləq stomatoloqa müraciət etmək lazımdır. Erkən diaqnoz və müalicə daha ciddi fəsadların qarşısını almağa kömək edir.
Sağlıq diş diş ağrısıMənbə: lent.az