Bir zamanlar Türkiyənin ən çox izlənilən filmlərində rol alıblar, milyonlar onları tanıyıb. Lakin kameralar sönəndə çoxu tənha qalıb. Kimisi yoxsulluqla mübarizə aparıb, kimisi unudulub, kimisi isə səssiz-səmirsiz həyata vida edib. Budur, “Yeşilçam”ın parlaq işıqlarının ardındakı acı həqiqətlər...
Lent.az Türkiyənin tanınmış sənətçilərinin kədərli həyat hekayələrini təqdim edir.
Yadigar Ejder: Hamı tanıyırdı, amma tənha idi
Kamal Sunal filmlərində canlandırdığı obrazlarla yadda qalan Yadigar Ejder yüzlərlə filmdə rol alsa da, əksərən epizodik rollarda göründüyü üçün müntəzəm gəlir əldə edə bilməyib. Şöhrətinə rəğmən maddi çətinliklərlə mübarizə aparan Ejder, gənc yaşda vəfat edərək "Yeşilçam"ın ən hüzünlü hekayələrindən birinin qəhrəmanı olub.
Mesut Engin: Baş rollardan tənhalığa
1970-ci illərdə "jön" kimi kinoya damğa vuran Mesut Engin, karyerası enişə keçdikdən sonra çətin günlər yaşamağa başlayıb. Bir vaxtlar baş rol təklifləri alan aktyor, illər keçdikcə iş tapmaqda çətinlik çəkib. Onun son illəri uğurla həyat şərtləri arasındakı uçurumu gözlər önünə sərib.
Suphi Kaner: Güldürən aktyorun dramla bitən sonu
"Yeşilçam"ın sevilən komediya aktyoru Suphi Kaner ekranda izləyicini güldürsə də, real həyatda ağır sınaqlarla üzləşib. Karyerasındakı tənəzzül və maddi sıxıntılar onda dərin psixoloji yaralar açıb. Aktyorun həyatı faciəvi şəkildə sona çatıb və geridə kinonun ən dramatik talelərindən birini qoyub.
İhsan Gedik: Yüzlərlə film, bitməyən məişət problemi
Sinema tarixinin ən məhsuldar xarakter aktyorlarından olan İhsan Gedik yüzlərlə ekran işində rol alsa da, bu əmək ona maddi təminat gətirməyib. Yaşlaşdıqca dolanışığını təmin etmək üçün fərqli işlərlə məşğul olan aktyorun hekayəsi "Yeşilçam"ın görünməyən üzünü – sığortasız və müəllif hüquqları olmadan işləyən sənətçilərin taleyini ortaya qoyur.
Qeyd edək ki, "Yeşilçam" dövründə aktyorların çoxu müəllif hüquqları almır və sosial sığorta olmadan çalışıblar. Xüsusilə ikinci dərəcəli rolları ifa edənlər qocaldıqda ciddi maddi sıxıntılarla qarşılaşıblar. Bu gün hələ də televiziyalarda təkrar-təkrar yayımlanan filmlərdə gördüyümüz həmin simaların çoxu, o uğurdan maddi bir qarşılıq ala bilmədən dünyadan köçüblər.
Pərdə önündə alqışlanan bu adlar, pərdə arxasında çox vaxt yalnız qalıblar. Onların filmləri hələ də izlənilir, replikaları hələ də xatırlanır, lakin həyat hekayələri Türkiyə kinosunun ən səssiz dramı olaraq qalır.
Yeşilçam Suphi Kaner Yadigar Ejder
