Təyyarəyə ildırımın düşməsi sərnişinlər üçün qorxulu görünsə də, aviasiya mütəxəssisləri bunun müasir sərnişin təyyarələri üçün nadir və təhlükəli olmayan hallardan biri olduğunu bildirirlər.
Lent.az xarici mediaya istinadən xəbər verir ki, bir sərnişin həyatında ikinci dəfə ildırımın təsirini yaşayıb.
İlk hadisə ABŞ-nin Florida ştatında, yer üzərində olarkən yaxınlıqdakı palma ağacına ildırım düşməsi zamanı baş verib. İkinci hadisə isə United Express aviaşirkətinin Leksinqtondan Çikaqoya uçan reysində qeydə alınıb.
Sərnişinin sözlərinə görə, təyyarə uçuş zamanı güclü fırtına zonasına düşüb. Pis hava şəraiti səbəbindən ekipaj bir müddət havada dövrə vurduqdan sonra eniş icazəsi alıb. Təyyarə enişə başladığı anda sərnişinlər pəncərədən kənarda güclü işıq parıltısı görüblər.
İldırım zərbəsindən sonra salonda təhlükəsizlik kəmərinin bağlanmasını göstərən işıqlı lövhə qısa müddətlik titrəyib və zəif bir səs eşidilib. Bir neçə saniyə sonra isə hər şey normala dönüb. Hadisə nəticəsində nə sərnişinlər, nə də təyyarə ciddi zərər görüb.
Sonradan stüardlardan biri təyyarəyə həqiqətən də ildırım dəydiyini təsdiqləyib. ABŞ Milli Meteorologiya Xidmətinin məlumatına görə, hər bir sərnişin təyyarəsi orta hesabla ildə bir və ya iki dəfə ildırım zərbəsinə məruz qala bilir.
Niyə ildırım təyyarə üçün təhlükəli sayılmır?
Keçmiş United Airlines pilotunun sözlərinə görə, müasir təyyarələrin konstruksiyası elektrik cərəyanını gövdənin xarici hissəsi boyunca təhlükəsiz şəkildə ötürəcək formada hazırlanıb.
Pilot bildirib ki, təyyarənin alüminium gövdəsi Faradey qəfəsi prinsipi ilə işləyir. Bu sistem elektrik yükünü təyyarənin xarici səthi boyunca yayaraq onun salonun içinə keçməsinin qarşısını alır. Eyni prinsip avtomobillərdə də tətbiq olunur və sərnişinləri elektrik cərəyanından qoruyur.
Hadisədən sonra nə edilir?
Mütəxəssislər qeyd edirlər ki, ildırım zərbəsindən sonra təhlükəsizlik qaydalarına uyğun olaraq təyyarə eniş etdikdən dərhal sonra texniki baxışdan keçirilir. Aviaşirkət hadisə barədə məlumat verir və mühəndislər gövdə, elektron sistemlər və digər hissələri ətraflı yoxlayırlar.
Bu yoxlamalar bəzən növbəti reyslərin gecikməsinə səbəb olsa da, pilotun sözlərinə görə, onun təcrübəsində ildırım zərbəsi nəticəsində uzun müddət istismardan çıxarılan təyyarə ilə rastlaşmayıb.
ildırım təyyarəMənbə: lent.az