Yaponiyalı alimlərin apardıqları yeni araşdırma ağ saçların yaranmasının təkcə yaşlanma ilə bağlı olmadığını göstərib. Tədqiqatın nəticələrinə görə, saçların ağarması orqanizmin DNT-ni zədələnmələrdən qorumaq üçün işə saldığı müdafiə mexanizmlərindən biri ola bilər.
Lent.az xarici mediaya istinadən bildirir ki, Tokio Universitetinin tədqiqatçıları saç follikullarındakı kök hüceyrələrin fəaliyyətini araşdırarkən maraqlı bioloji proses aşkar ediblər.
Alimlər siçanlar üzərində apardıqları təcrübələr zamanı müəyyən ediblər ki, DNT zədələndikdə həmin kök hüceyrələr yenilənmə qabiliyyətini dayandırır və fərqli hüceyrələrə çevrilir. Bu dəyişiklik isə saçların piqmentini itirməsinə, yəni ağarmasına səbəb olur.
Ağarma orqanizmin müdafiə reaksiyası ola bilər
Araşdırmaya görə, bu proses yaşlanma ilə əlaqəli diferensiasiya adlanır. Onun əsas məqsədi zədələnmiş hüceyrələrin bölünməsinin qarşısını almaq və şişlərin yaranma riskini azaltmaqdır.
Tədqiqatın həmmüəllifi, professor Emi Nişimura bildirib ki, eyni kök hüceyrə qrupu məruz qaldığı stressin növündən və ətraf mühitdən gələn siqnallardan asılı olaraq tamamilə fərqli istiqamətdə inkişaf edə bilər. Hüceyrələr ya tükənə, ya da çoxalmağa davam edə bilər.
Ağ saç və melanoma eyni mexanizmlə əlaqəli ola bilər
Alimlərin sözlərinə görə, saçların ağarması və melanoma kimi dəri xərçənginin yaranma riski eyni hüceyrə mexanizminin fərqli nəticələridir. Bu mexanizm DNT zədələndikdə aktivləşir və orqanizmi daha ciddi fəsadlardan qorumağa çalışır.
Ağ saç bəzən müsbət əlamət ola bilər
Araşdırma zamanı müəyyən edilib ki, bəzi kanserogen maddələrin təsiri altında hüceyrələr bu müdafiə prosesindən yayınaraq yenilənmə qabiliyyətini saxlayırlar. Lakin bunun mənfi tərəfi də var. Belə hüceyrələrin nəzarətsiz çoxalma ehtimalı artır və bu da onkoloji xəstəliklərin inkişaf riskini yüksəldə bilər.
Mütəxəssislər bildirirlər ki, bu nəticələr saçların ağarması ilə xərçəngdən qorunma arasında birbaşa əlaqə olduğunu göstərmir. Bununla belə, ağ saçların yaranması orqanizmin DNT zədələnməsinə qarşı uyğunlaşma reaksiyasının göstəricisi ola bilər.
Yeni kəşf tibbdə mühüm rol oynaya bilər
Tədqiqat heyəti qeyd edir ki, araşdırma hələlik siçanlar üzərində aparılıb və nəticələrin insanlar üçün tam təsdiqlənməsi üçün əlavə elmi işlərə ehtiyac var.
Bununla belə, əldə edilən nəticələr regenerativ tibb sahəsində yeni müalicə üsullarının hazırlanmasına və onkoloji xəstəliklərin qarşısının alınması istiqamətində aparılan araşdırmalara mühüm töhfə verə bilər.
Bundan əvvəl alimlər 47 il davam edən başqa bir araşdırmanın nəticələrini də açıqlamışdılar. Həmin tədqiqat göstərmişdi ki, fiziki imkanların zəifləməsi insanların düşündüyündən daha tez, təxminən 35 yaşdan başlayır və bu proses yüksək fiziki hazırlığa malik insanlarda da müşahidə olunur.
saçların ağarmasıMənbə: lent.az