Yaxındangörmə (miopiya) dünyada sürətlə yayılan görmə problemlərindən birinə çevrilir. Alimlər hesab edirlər ki, mövcud tendensiya davam edərsə, yaxın onilliklərdə bu problem milyardlarla insanı əhatə edəcək.
Lent.az xarici mediaya istinadla xəbər verir ki, mütəxəssislərin sözlərinə görə, miopiya zamanı göz alması uzanır və işıq şüaları tor qişanın üzərinə deyil, onun ön hissəsinə düşür, nəticədə insan uzaqdakı əşyaları aydın görə bilmir.
Araşdırmalara əsasən, bu problem təkcə görmənin zəifləməsinə səbəb olmur. Miopiyası olan insanlarda qlaukoma, tor qişanın qopması və yaşa bağlı sarı ləkə degenerasiyası kimi ciddi göz xəstəliklərinin yaranma riski də artır.
Hazırda Yer kürəsində təxminən hər üç nəfərdən biri yaxındangörmədən əziyyət çəkir. Alimlərin proqnozuna görə, 2050-ci ilə qədər miopiyalı insanların sayı 4,8 milyarda çatacaq ki, bu da dünya əhalisinin təxminən yarısına bərabər olacaq.
Yaxındangörmə niyə artır?Mütəxəssislər bildirirlər ki, xəstəliyin bu qədər geniş yayılmasını yalnız irsi faktorlarla izah etmək mümkün deyil. Son illər aparılan araşdırmalar göstərir ki, müasir həyat tərzi də mühüm rol oynayır.
Əsas səbəblərdən biri uşaq və yeniyetmələrin dərs yükünün artması və açıq havada daha az vaxt keçirməsidir. Alimlərin sözlərinə görə, günəş işığı gözün normal inkişafına kömək edən maddələrin sintezini stimullaşdırır və göz almasının həddindən artıq uzanmasının qarşısını almağa kömək edə bilər.
Smartfonlar əsas səbəbdirmi?Araşdırma müəllifləri qeyd edirlər ki, smartfon və digər elektron ekranların miopiyanın əsas səbəbi olması hələ tam sübuta yetirilməyib.
Bəzi tədqiqatlar yaxın məsafədən uzun müddət oxumağın və ekran qarşısında çox vaxt keçirməyin riski artırdığını göstərsə də, alimlər bu mövzuda qəti nəticəyə gəlməyiblər.
Miopiyanı müalicə etmək mümkündürmü?Mütəxəssislər bildirirlər ki, yaxındangörməni tam aradan qaldırmaq mümkün olmasa da, onun inkişafını ləngitmək üçün müxtəlif üsullar mövcuddur.
Bunlara xüsusi kontakt linzalar, ortokeratologiya üsulu, aşağı dozalı atropin damcıları və hazırda effektivliyi araşdırılan yeni müalicə metodları daxildir.
Alimlər hesab edirlər ki, problemin miqyasını azaltmaq üçün uşaqların daha çox açıq havada vaxt keçirməsi, gözlərin mütəmadi yoxlanılması və görmə problemlərinin erkən aşkarlanması böyük əhəmiyyət daşıyır.
göz yaxındangörməMənbə: lent.az