Yapon evləri haqqında danışarkən insanların diqqətini yalnız minimalist dizayn deyil, həm də məkanın təşkilinə tamamilə fərqli yanaşma cəlb edir. Ənənəvi yapon evində döşəmə sadəcə yer örtüyü deyil, gündəlik həyatın ayrılmaz hissəsidir. Onun üzərində dincəlir, qonaq qəbul edir, yemək yeyir, işləyir, meditasiya edir və hətta yatırlar. Məhz buna görə yaponlar əsrlər boyu hər detalı incəliklə düşünülmüş evlər inşa ediblər. Yaponiyada yaranan bir çox dizayn həlli bu gün dünyanın müxtəlif ölkələrində geniş tətbiq olunur.
Lent.az xarici KİV-ə istinadən xəbər verir ki, yapon evlərinin ən məşhur xüsusiyyətlərindən biri girişdə yerləşən və genkan adlanan xüsusi sahədir. Bu hissə evin əsas döşəməsindən bir qədər aşağı səviyyədə olur və küçə ayaqqabılarının burada çıxarılması üçün nəzərdə tutulub. Bundan sonra həm ev sahibləri, həm də qonaqlar otaqlara ayaqyalın, corabla və ya ev ayaqqabısı ilə daxil olurlar. Bu qayda evə toz, qum və çirkin daxil olmasını xeyli azaldır və təmizliyi qorumağı asanlaşdırır.
Yaponlar niyə böyük divanlardan istifadə etmirlər?
Ənənəvi yapon evlərində iri mebellərin əvəzinə təbii materiallardan hazırlanan tatami döşəklərdən istifadə olunur. Onlar oturmaq, dincəlmək və yatmaq üçün rahat səth yaradır. Gecə isə yaponlar futon adlanan yüngül döşəyi açırlar. Səhər isə onu asanlıqla yığışdırırlar. Bunun sayəsində eyni otaq gün ərzində qonaq otağı və ya iş sahəsi, axşam isə yataq otağı funksiyasını yerinə yetirir. Maraqlıdır ki, Yaponiyada bəzi otaqların ölçüsü bu gün də kvadratmetrlə deyil, neçə tatami yerləşməsi ilə müəyyən edilir.
Hamam otağı bol su istifadə etmək üçün nəzərdə tutulub
Yapon hamamlarının da özünəməxsus xüsusiyyətləri var. İnsan vannaya girməzdən əvvəl mütləq duş qəbul edərək tam yuyunur. Bu səbəbdən hamamın döşəməsi güclü hidroizolyasiya ilə təmin olunur, suyun tez axması üçün xüsusi maililik verilir və sürüşməyən, tez quruyan materiallardan hazırlanır. Belə layihələndirmə həm təmizliyi asanlaşdırır, həm də təhlükəsizliyi artırır.
Kənar şəxsləri xəbər verən döşəmə
Qədim yapon qəsrlərində maraqlı təhlükəsizlik sistemi mövcud idi. "Bülbül döşəməsi" adlanan bu sistemdə taxta lövhələr üzərində yeriyərkən quş səsinə bənzər xüsusi cingilti yaranırdı. Beləliklə, ev sahibi kimsənin otaqda hərəkət etdiyini dərhal hiss edə bilirdi. Bu üsul müasir siqnalizasiya sistemləri yaranmazdan xeyli əvvəl istifadə olunurdu.
Təmizlik yapon mədəniyyətinin ayrılmaz hissəsidir
Yaponlar vaxtlarının böyük hissəsini döşəmə üzərində keçirdikləri üçün onun təmizliyinə xüsusi önəm verirlər. İnsanlar uşaqlıqdan evlərini özləri təmiz saxlamağa və səliqəyə riayət etməyə öyrəşdirilir. Döşəmələrin təmizlənməsi zamanı adətən təbii materiallara zərər verməyən yumşaq təmizləyici vasitələrdən istifadə edilir. Bu isə örtüyün uzunömürlü və rahat qalmasına kömək edir.
Yapon üslubu niyə dünyada populyarlaşır?
Müasir Yaponiyada artıq bir çox mənzildə adi çarpayı, stul və digər mebellərdən istifadə olunsa da, əsas prinsip dəyişməyib. Yaşayış sahəsi geniş, funksional və rahat olmalıdır. Məhz buna görə dünyanın müxtəlif ölkələrində çalışan dizaynerlər yaponlardan ilham alırlar. Girişdə ayaqqabı üçün ayrıca zona yaradılması, minimalist interyer, alçaq mebellər və artıq əşyalardan uzaq, açıq məkan konsepsiyası getdikcə daha çox tətbiq olunur.
Maraq Yaponiya yapon evləri yaşayış məkanıMənbə: lent.az